އުނގެނުމާއި އުނގަންނައިދިނުމުގައި ޝައުގުވެރިކަން

ބޮލްގް ޓާސްކް 1

އުނގެނުމާއި އުނގަންނައިދިނުމުގައި ޝައުގުވެރިކަން

އުނގެނުމާއި އުނގަންނައިދިނުމުގައި ޝައުގުވެރިކަމަކީ ވަރަށް މުހިންމު ކަމެކެވެ. އެހެނީ ތިމާ ކުރާ ކޮންމެ ކަމެއް ވެސް ގުޅިފައިވަނީ ޝައުގުވެރިކަމާއެވެ. ބައެއް މީހުންނަކީ އެމީހުންގެ އަމިއްލަ ޒާތުގައި ވަކި ކަންތައްތަކެއް ކުރުމަށް ޝައުގުވެރިކަން ހުންނަ މީހުންނެވެ.  އެ ފަދަ މީހުން ތިބޭނީ އަބަދުވެސް އެކަމެއް ކުރާ ހިތުންނެވެ.

ބައެއް ސައިކޮލޮޖިސްޓުން ދެ ގޮތަކަށް މޯޓިވޭޝަން ( ޝައުގުވެރިކަން) މާނަކުރެ އެވެ. އެއް ގޮތަކީ ފަރުދީ ގޮތުން ކޮންމެ ފަރުދެއްގެވެސް އެތެރޭގެ ބޭނުންތަކުގެ މައްޗަށް ބިނާވެފައިވާ މޯޓިވޭޝަނާއި ވަކި ހާލަތަކާ ގުޅިގެން އުފެދޭ މޯޓިވޭޝަނެވެ. މިގޮތުން ކުލާސް ރޫމްގައި ކުދިން ޝައުގުވެރިވާނޭ ގޮތަށް ކަންތައްތައް ބައްޓަން ކުރުމީ ވަރަށް މުހިންމު ކަމެކެވެ. މިސާލަކަށް ޓާރމް ޓެސްޓުން އެންމެ ރަނގަޅު ނަތީޖާ ހޯދާ ކުދިންނަށް އިނާމެއް ދޭނަމޭ ބުނުން ނުވަތަ ހުރިހާ ކުދިން ފާސް ވެއްޖެނަމަ ދަތުރަކު ދާނަމޭ ބުނުން ފަދަ ކަންކަމަކީ އޭގެ ސަބަބުން ކުދިންގެ ނަތީޖާ ރަނގަޅުވުމަށް މަގުފަހިވާ ކަންކަމެވެ. ވީމާ ކިޔަވައިދޭއިރު، ކުދިން ޝައުގުވެރިވާނޭ ގޮތްތަކަކީ ކޮބައިތޯ ބަލައި އެ ގޮތްގޮތައް ކުދިން ޝައުގުވެރިކުރުވުމަކީ ވަރަށް މުހިންމު ކަމެކެވެ.

އުނގެނުމާއި އުނގަންނައިދިނުމުގައި ސައިކޮލޮޖީ

ބޮލްގް ޓާސްކް 1

އުނގެނުމާއި އުނގަންނައިދިނުމުގައި ސައިކޮލޮޖީ

އެޑިޔުކޭޝަނަލް ސައިކޮލޮޖީ އަކީ އުނގަންނައިދިނުމުގެ މާހައުލުގައި ދިމާވާ އެކިއެކި މައްސަލަތަކާއި އެ މައްސަލަތައް ދެނެގަނެ ހައްލުކުރާނެގޮތްތަކާއި، އުނގަންނައިދިނުމާ ގުޅިފައިވާ އެކިއެކި ތިއަރީތަކާއި މި ތިއަރީތައް ބޭނުންކުރާނެ ގޮތްތައް ކަނޑައެޅިފައިވާ ޢިލްމެވެ. ތާރީޚަށް ބަލާއިރު، މި އިލްމު ތަފާތު އެކި މަރުހަލާތަކަށް ބަދަލުވެފައިވާއިރު، އެންމެ ފުރަތަމަ މި އިލްމުގައި  ބެލިފައިވަނީ ފަރުދީތަފާތުތަކާއި ހާސިލު ކުރެވޭ މިންވަރުތައް ދެނެގަތުމަށެވެ. ނަމަވެސް ފަހުގެ ތާރީޚެއްގައި އުނގަންނައިދިނުމުގައި ހަރަކާތްތެރިވާ ސައިކޮލޮޖިސްޓުން ވަނީ ދަރިވަރުންގެ ވިސްނުން ތަރައްގީވަމުން އަންނަގޮތާއި ދަސްކުރާގޮތް ދެނެގަތުމުގެ އިތުރުން ދަރިވަރު ދިރިއުޅޭ ވެށްޓާއި ޘަގާފަތުން އަދި އިޖްތިމާއި އެކި އެކި ގުޅުންތަކުގެ ސަބަބުން ދަރިވަރުގެ އުނގެނުމަށާއި ކުރިއެރުމަށް އަންނަ އަސަރުތައް ދެނެގަތުމަށްޓަކައި ދިރާސާތަކެއް ކޮށްފައެވެ.

ކިޔަވައިދިނުމުގެ ދާއިރާގައި އެޑިޔުކޭޝަނަލް ސައިކޮލޮޖީއަކީ  އުނގަންނައިދިނުމުގައި ހަރަކާތްތެރިވާ ކޮންމެ މުދައްރިސަކުވެސް އެނގިފަ އޮތުން މުހިންމު އިލްމެކެވެ. ސަބަބަކީ ކުއްޖާގެ ވިސްނުމާއި ސުލޫކަށް އަންނަ ބަދަލުތައް މުދައްރިސަށް ފާހަގަކުރެވެނީ މި އިލްމުގެ ތެރެއިން ކަމުގައި ވާތީއެވެ. ހަމައެއާއެކު އުނގަންނައިދިނުމާއި ގުޅޭގޮތުން ހެދިފައިވާ އެކިއެކި ތިއަރީތަކަކީ އުނގަންނައިދިނުމުގެ މަސައްކަތް ދެނެގަތުމުގައި ބޭނުން ހިފިދާނެ ތިއަރީތަކެކެވެ. މި ތިއަރީތަކުގެ އެހީގައި ދޭދޭ ކުދިންގެ މެދުގައި ހުންނަ ވިސްނުމުގެ ތަފާތުތަކާއި އެކި ކުދިން އުނގެނުމުގައި ގެންގުޅޭ ގޮތްތައް ދަސްކުރެވެ އެވެ. އެހެންކަމުން އެޑިޔުކޭޝަނަލް ސައިކޮލޮޖީ އާއި މި އިލްމުގެ ދަށުން ހެދިފައިވާ ތިއަރީތަކަކީ އުނގަންނައިދިނުން މަގުފަހިކުރުމަށްޓަކައި ބޭނުން ހިފިދާނެ ބައިތަކެއް ކަމުގައި ގަބޫލުކުރެވެ އެވެ.